Af jólahaldi

Pakkar opnaðir - mikið fjör hjá ungviðinum

Hér halda flestir um nefið (ætli það sé maturinn?)

Jólahaldið í Hólmgarðinum hefur öðru fremur einkennst af lasleika. Dóra, Skarphéðinn, Heiða og Bergrún hafa öll verið lasin undanfarið. Dóra var orðin ansi veik á þorláksmessu. Af henni bráði þó nokkuð á aðfangadag og hún var bara nokkuð hress um kvöldið. Þá var Skarphéðinn orðinn lasinn. Heiða og Bergrún eru að jafna sig og orðnar nokkuð sprækar.

Hér eru þær mæðgurnar Úa og Oddný

10 manns voru í Hólmgarðinum á aðfangadagskvöld. Hér eru nokkrar myndir frá því.

Á jóladagsmorgun leit ég við hjá mömmu og pabba og hitti Gumma og Hrefnu.
Mamma var hress og komin á kaf í lestur.
Fór í jólamessu eftir hádegið með Úu, Oddnýju og Steinunni.
Dóra ansi slæm af kvefpestinni.
Hangikjötsát um kvöldið.

Æ. þetta kvef

Það er einhver uppdráttarsýki í mannskapnum, eða öllu heldur kvefpest. Bergrún er búin að liggja flöt nánast frá því hún kom heim og Heiða slöpp - og nú er Dóra bara sárlasin með hita. Ég stend þó uppi enn (sjö, níu, þrettán - bánk, bánk, bánk).

Mamma fær heimferðarleyfi yfir jólin - hvort sem það er vegna þess að hún er fær um það eða það hentar sjúkrahúsinu. Allavega er hún ánægð með það - og þá ekki síður pabbi.

Svo sjáum við bara til hvað morgundagurinn (aðfangadagur) ber í skauti sínu.

Myndin tengist ekki þessu veikindaveseni. Þvert á móti er hér einn matlystugur.

Jólafrí

Þá erum við Dóra komin í jólafrí. Törninni lauk með jólasýningu nemenda en síðan var haldið til Reykjavíkur þar sem jólin verða haldin að þessu sinni. Í gær var skroppið til Keflavíkur til að hitta Steinunni. Heiða og Skarphéðinn komu með.

Við fórum í kirkjugarðinn til að huga að leiðum og setja upp ljós.

Í tilefni jólanna er hér mynd af henni Grýlu jólasveinamömmu.

Af rennsli

Hluti 5. bekkjar rennir niður snakki.

Undanfarnir dagar hafa einkennst af miklu rennsli. Þetta byrjaði allt með miklu lægðarennsli inn yfir landið sem aftur orsakaði mikið vatnsrennsli úr lofti. Fylgjandi því var óvenjulega hratt loftrennsli sem olli á stundum roki, jafnvel ofsaveðri. Af þeim sökum áttu bílar það til að renna út af vegum, sérstaklega þar sem vindar ná sér vel á strik og sviftivindar gerast snarpir. Af ótta við téða vinda lá flug niðri og setti það strik í rennirí hjá fólki sem var að koma frá útlöndum. Þannig var það t.d. með hana Álfheiði dóttur okkar. Bergrún rann hins vegar óhindruð í gegnum þetta allt saman or renndi í hlað heima hjá sér um níuleytið í gærmorgun.

Talandi um rennsli, þá var rennt í gegnum hátíðardagskrá nemenda Varmalandsskóla í morgun. Þetta rann bara nokkuð vel - alla vega lauk því á tilsettum tíma. Þá var tekið til við að renna niður hátíðarmat og síðan var rennt í gegnum jólapóstinn eins og venja er til á litlujólum í skólum.

Læt ég hér með lokið allri umfjöllun um rennsli, þó að ég hefði getatað haft þennan spuna umtalsvert lengri

Heiða kom heim að morgni laugardags með barnabarnið okkar. Þetta var ansi þvælin ferð fyrir hana því að fluginu var frestað frá hádegi á föstudegi fram til kl. 02:00 aðfararnótt laugardags, vegna veðurs.

Við Dóra komum ekki til Reykjavíkur fyrr en um ellefuleytið á föstudagskvöldið - vorum að bíða af okkur versta veðrið eins og flugfélagið. Tengdaforeldrar Heiðu sóttu þau mæðginin.

Ekki hef ég nú komið miklu í verk um helgina - er óþarflega laus við jólastress.

Aftur á móti hef ég heimsótt pabba og mömmu. Mamma gæti losnað af sjúkrahúsinu fyrir jól.

Á morgun kemur svo Bergrún heim - núna frá USA. Síðast var spilað í Las Vegas. Næst er það Eyjaálfan.

Morgunleikfimi

Gísli Einarsson, fréttamaður, kom í skólann í morgun með sín tæki og tól og tók upp morgunleikfimi 4. bekkinga, sem þeir iðka eftir útvarpsþættinum, "morgunleikfiminni", í Ríkisútvarpinu. Þessi dagskrárliður er gamall í hettunni þar á bæ.

Útför Bosh (ekki Bush - því miður)

Þar kom loksins að því. Í gær hentum við gamla Bosh ísskápnum sem væntanlega er búinn að standa vörð í eldhúsinu undanfarin 50 ár. Þessi ísskápur hefði átt skilið að fá virðulega útför með guðsorði og yfirsöng en í stað þess var laumast með hann inn í Sorpu og hann skilinn þar eftir eins ungabarn á klausturtröppum - ja, eða í ruslatunnu.

Reyndar var skápurinn hættur að kæla. Það snörlaði bara eitthvað í honum.

Á föstudagskvöldið fórum við Dóra á íburðarmikið jólahlaðborð með starfsmönnum Varmalands. Mikið át og síðan átti að syngja. Hvernig á maður að syngja, sitjandi við borð og hálfsprunginn úr ofáti?

Um helgina höfum við Dóra verið að stússast í Hólmgarði 6. Það fer að bresta á með jólaveseni.

Heiða er væntanleg heim á föstudaginn með soninn Skarphéðin. Hér er jólamynd í tilefni af því.

Þessi tími!

Þá er Fríða farin af landi brott og komin til síns heima. Geir hefur væntanlega tekið henni tveim höndum eins og hún á skilið - hann má reyndar ekki af henni sjá. Ranka verður hér enn um sinn, eða fram á laugardagsmorgun.

Bergrún er á leið til Mexíkó á morgun - þar verður spilað 8. - og fer þaðan til Englaborgar og Las Vegas. Ég held að það séu þrennir eða fernir tónleikar í þessum túr. Hún kemur væntanlega heim 17. eða 18. des.
Mamma fer inn á sjúkrahús á morgun - og í aðgerð. Vonandi kemst hún þó heim fyrir jól.

Mót

Ég hef verið að sniglast kringum systur mínar og foreldra um helgina.

Í gærkvöld tróðum við okkur sameiginlega út af steiktu kjöti, moltuberjadesert og ís. Moltuberin eru afar hátt skrifuð í berjamenningu Norðmanna. Það vex mikið af þeim norðanlands og stundum upp til heiða, t.d. í Setesdal þar sem Fríða á sumarhús.
Á myndinni sem fylgir er Fríða að sleikja síðustu leifarnar úr skálinni.
Í kvöld förum við Dóra í hangikjötsveislu hjá Kór Kálfatjarnarkirkju. Við sungum í þessum kór í áratug eða svo. Kíkjum við hjá Steinunni á eftir, áður en við förum í Vogana.

Ættingjar og afkomendur

Nú eru báðar eldri systur mínar mættar í sína árlegu Íslandsheimsókn til að heimsækja þau gömlu og gera jólainnkaupin - hangikjet og rúllupylsur. Hjörtur nýfarinn heim til Svíþjóðar. Andri búinn að syngja á tvennum tónleikum með Háskólakórnum. Nú er hann orðinn tenór, fyrir tveimur árum var hann bassi - ætli hann verði ekki orðinn sópran eftir fáein ár.
Bergrún fer utan til Mexíkó 5. des og síðan til USA. Hún verður samt komin heim tímanlega fyrir jól - líkt og Heiða sem kemur heim 14. des.
Þegar síðast fréttist var ekki búið að kalla mömmu inn í aðgerð. Ég hélt að það yrði í þessari viku en það virðist ætla að dragast eitthvað - vonandi samt ekki of lengi.

Enn við sama ....

Kominn föstudagur. Það þýðir ferðadagur hjá okkur Dóru. Reykjavík.
Mamma er heima en síðustu fréttir eru á þá leið að hún sé enn og aftur á byrjunarreit. Á að fara í aðgerð enn á ný í næstu viku.
Hjörtur fer utan á laugardagsmorgun. Ætli ég skutli honum ekki áleiðis - þó ekki lengra en í Keflavík.
Ég hitti Guðmund frænda í Borgarnesi á mánudag. Hann leysir þar af á bílasölu. Hann var hress að vanda og hefði áreiðanlega selt mér bíl ef ég hefði stoppað lengur við en ég gerði.
Annars er allt við það sama....

Ljóðræna

Í gær var dagur íslenskrar tungu. 5. bekkurinn minn tók að því tilefni þátt í ljóðasýningu 10 ára barna í fræðsluumdæminu. Sýning í Safnahúsinu í Borgarnesi. Við Dóra mættum þar ásamt tveimur nemendum. Það var bara gaman. Hittum Stínu frá Seftjörn ásamt manni og dóttur, sem einmitt er 10 ára og átti verk á sýningunni.

Ókum síðan áfram til Reykjavíkur. Dóra fór til Oddnýjar, sem er lasin og var henni innan handar - hún fór til hennar aftur núna í morgun. Ég ætla að kíkja á pabba og Hjört, sem er kominn til landsins og verður hér út næstu viku. Mamma fær að kíkja heim í dag og á morgun - og verður heima frá mánudegi til föstudags svo það hittist vel á með Hjört. Síðan koma systurnar 26. og 27.

Við töluðum áðan við Heiðu og Skarphéðin. þau voru bara hin hressustu. Skarphéðinn gerði tilraunir til að skríða til okkar gegnum tölvuna - það tókst því miður ekki. Bergrún kemur heim úr Suður-Ameríkuför sinni aðfararnótt þriðjudags og verður heima fram í næsta mánuð.

Annars er lífið bara í sínum föstu skorðum.

Klipp

Í dag afrekuðum við Dóra það að láta klippa okkur. Ég lét taka, á að giska, einn og hálfan sentimetra af hárinu á mér. Okkur samdist allavega um það, mér og klippikonunni. Líklega hefur Dóra misst meira.

Ég málaði einn glugga, held ég. Það var að vísu byrjað að skyggja þegar ég hóf málverkið - ég athuga á morgun hvort það eru einhverjir helgidagar sjáanlegir - það er auðvitað sunnudagur á morgun.

Það var gott veður í dag. Það var heimsóknardagur í dag - pabbi og mamma. Dóra fór í sund meðan ég vísiteraði hjá pabba.

Dóra náði eldavélinni fram (mér tókst það ekki um daginn), setti nýjar perur á sinn stað og þreif á bak við. Hún er komin af tæknifólki. Mínir áar voru flestir einhverjir rolluhausar.

Ljótt að segja svona!

Engar sérstakar .......

Maður er alltaf að endurtaka sömu fréttafrasana. Lífið rúllar eftir þannig hjólfari að það þarf lítið að hreyfa stýrið.
Mamma virðist þó vera á batavegi, eftir síðustu fréttum að dæma og von til þess að hún komist heim eftir viku - ef ekkert nýtt kemur til. Það hefur reyndar orðið raunin ítrekað.
Bergrún er orðin hress - hún var dálítið slöpp um tíma þó að hún léti sig hafa það. Er núna í Argentínu og svo í Cile og Kólumbíu. Svo kemur hún heim - svona eftir tíu daga.
Við hjónakornin förum til R um helgina. Kannski gerum við eitthvað þar.

Í besta falli

Við Dóra fórum á kínverskan veitingastað í gær með Varmalandsliðinu en slepptum því að sjá einhverja uppistandsleiksýningu um pabba. Steinunn var í Hólmgarðinum.
Ég leit til mömmu í gær þegar við komum í bæinn og til pabba um kvöldið. Í dag leit ég við hjá honum í tvígang. Í seinna skiptið eftir að hann datt - Securitas lét viða af því (öryggishnappurinn virkar vel). Hann meiddi sig sem betur fer ekki mikið - samt aumur um ökkla og í hnakka.

Oddný og Úa orkubolti voru hjá okkur seinnipartinn.

Annars blákalt tíðindaleysið - ekki þýðir að fjasa mikið um veðrið - það er bara bænda- og sjómannasiður (eða íslenskur ósiður).

Fréttum ekki mikið af Bergrúnu. Hér er þó slóð inn á túrbloggið http://www.blog.bjork.com/ þar sem hún á nokkur komment.

Það held ég núúú.

Taka tvö

Í dag gekkst mamma undir sína aðra aðgerð í þessari spítalatörn. Áðan talaði ég við Einar lækni sem sagði aðgerðina hafa tekist vel. Samt sem áður átti hann von á að hún yrði að lágmarki 2 vikur í viðbót á sjúkrahúsinu - jafnvel 3.
Veðrið er gott í dag - sólskin - og snjórinn sem féll í dag er horfinn.

Hvað vil ég upp á dekk?

Jú, ég fór með þann græna á dekkjaverkstæði í morgun. Tók daginn snemma af ótta við langar dekkjaskiptabiðraðir, sérstaklega í ljósi hálkufrétta á fjallvegum. Var mættur rétt upp úr 8:00 og þurfti ekkert að bíða - en varð að versla mér tvö ný dekk. Það var nú það....

Heimsótti pabba - og við Dóra mömmu eftir hádegið. Þau voru bæði nokkuð hress. Mamma komin með soggræjur við sárið. Þær ku eiga að hjálpa til með batann. Sat á biðstofu læknavaktarinnar mestallan seinnipartinn. Mig vantaði lyfseðil.

Dóra fór og hitti mömmu sína í Keflavík

Þannig fara nú dagarnir....

það er blautt

Það er búið að rigna þessi ósköp að undanförnu - varla hundi út sigandi á stundum. Og það rignir jafnt í Ríó sem í Reykjavík. Þannig að það er ekki bara hér á landi á.
Vikan búin (hér um bil) og komin helgi. Þá förum við Dóra til R og hittum húsdraugana þar - og sækjum Bláma í Smyrlahraunið. Bergrún skildi hann þar eftir, þriðjudagsmorguninn sem hún flaug utan áleiðis til Brasilíu. Þar verður spilað í kvöld í rigningu.
Mamma er enn á sjúkrahúsinu. Þetta dregst og dregst. Ég er hræddur um að hún sé farin að missa trúna á bata.
Vona það besta.....

Lífsmark

Ég vildi bara láta vita að við Dóra erum á lífi og líður bara nokkuð vel. Ég held þó að það sé meira að gera hjá Dóru en mér - hún er líka svo samviskusöm að mér finnst það stundum vera um of. Ég er aftur á móti haldinn þægilegu kæruleysi sem auðvitað kemur mér oft í koll. Ég hef reyndar ekki lengi átt jafn náðuga daga eins og nú um stundir. Vonandi endist það sem lengst - eg er með latari mönnum.
Nú líður að því að Bergrún fari til Suður-Ameríku - 23 október. Við sjáum hana því ekki fyrr en skömmu fyrir jól. Ég held að síðustu tónleikarnir séu 15. desember.

Brynjólfshús í október. Þakið er ekki farið af.

Mamma er enn á sjúkrahúsinu og verður þar líkast til enn um sinn. Andri og Bergrún heimsóttu hana á miðvikudaginn.
Í dag ætla ég að reyna að fara á Borðeyri og ganga frá húsinu fyrir veturinn.
Á morgun förum við Dóra til Reykjavíkur og þá hittum við auðvitað Bergrúnu áður en hún fer utan sem og ýmsa aðra sem þar um slóðir eru.

Amm - æli

Mér hefur aldrei verið neitt sérstaklega um afmæli gefið og síst af öllu mín eigin. Ég lendi samt í því árlega að einhverjir átti sig á því að þessi árlegi dagur sé upp runninn og "láti það berast". Mér finnst ég þá standa hálf berrassaður á sviði - hvað er svona merkilegt við afmæli?
Lenti í þessu í gær. Krakkar fóru að syngja afmælissöng.
Sit nú við tölvu í Hólmgarði og pikka. Dóra varð eftir í Borgarfirði - með botn og allt - fékk "stelpuhóp" þangað uppeftir í gær og dvaldi í sumarbústað í nótt eftir fagnað í gærkvöld. Hún kemur e.t.v. seinna í dag.

Þetta er ekki ég - en þungt hugsi

Ég er að fara að drífa mig á tónleika eftir tvær mínútur - Bergrún er að spila í Norrænahúsinu kl. 14:00.
Heimsæki mömmu á sjúkrahúsið á eftir.

Í einum kór

Aftur erum við Dóra stödd í höfuðstaðnum. Búinn að skoða pabba - og mömmu sem er á sjúkrahúsinu að jafna sig eftir aðgerðina. Við Dóra vorum að koma frá Keflavík þar sem við hittum Steinunni, en þar áður vorum við á æfingu með kór Kálfatjarnarkirkju. Það var gaman að hitta liðið aftur. Fengum kaffi og pönnukökur í hléi. Ætli við syngjum ekki með þeim í messu á morgun.

Þetta er hann Skarphéðinn sem fór í dýragarinn í dag

Veðrið miklu betra en von var á; sól og stinningskaldi úr norðri og útlit fyrir svipað veður á morgun.
Heyrðum í Heiðu. Hún var að fara í dýragarðinn í Köben.
Á morgun fer Steinunn með okkur upp að Varmalandi og verður hjá okkur einhverja daga.
Svona er nú það...

Af bændum og búaliði

Enn og aftur erum við stödd í Hólmgarðinum. Það er ósköp notalegt. Okkur tókst að koma þeim bláa í viðgerð - liðaðgerð á framhjóli (þetta heitir víst spindill). Svo kom Bergrún heim í gærmorgun úr 5 vikna tónleikaferðalagi - ósköp þreytt greyið. Við sóttum hana á völlinn - flugvélin lenti um háf sjö. Þess vegna notuðum við tækifærið og gistum hjá Steinunni í Keflavík. Bergrún svaf svo í mestallan gærdag en vaknaði undir kvöld og við héldum upp á heimkomuna með steiktu læri. Andri kom og borðaði með okkur.

Ég hef verið nokkuð hjá gömlu hjónunum í Hólmgarðinum. Það líður að því að mamma verði lögð inn í aðgerð vegna sársins - það vill ekki gróa á eðlilegan hátt. Gulla frænka er búin að vera bjargvættur þeirra í þessu læknabaksi sem og í öðru - hún hlýtur að eiga stóra innistæðu á ónefndum stað fyrir allt það sem hún hefur verið að bauka fyrir aðra. Mamma er bara einn af mörgum skjólstæðingum.

Í dag hef ég verið að mála stofugluggann og Dóra er núna að baka fyrir kvöldsamkomu kennara á Varmalandi.

Áðan náðum við sambandi við Heiðu í gegnum skæpið. Við gátum talað við hana og séð hana og Skarphéðin. Það verður gaman í framtíðinni að geta notað þessa aðferð.

Seinni partinn í dag förum við uppeftir, en á morgun er engin kennnsla - við verðum með vinnudag í Borgarnesi.

Af beyglum

Staddur í Hólmgarði - Dóra í Ólafsvík. Hún fór þangað með Sillu og fleiri MÍ-ingum úr árgangi sínum frá Ísafirði. Ekkert sérstakt í fréttum utan það. Jú, ekið á nýkeyptan bíl Oddnýjar sama dag og hún fékk hann "í hendur". Skaðvaldurinn stakk af og Oddný situr uppi með hluta skaðans. Um daginn var ekið aftan á bíl Andra - hann var sjálfsagt í rétti.

Þannig er nú það.

Mamma á að fara í aðgerð með sárið sitt í næstu viku. Það hefði betur mátt gerast fyrir nokkrum mánuðum síðan.

Þannig er það nú. Segi pass.

Miðvikudagurinn 19. sept.

Eftir allt saman þá fórum við Dóra til Reykjavíkur á sunnudaginn. Eins gott því forstofan var að fyllast af blöðum og pósti.

Kennslunni er lokið í dag - á morgun verð ég bara með einn bekk. Það verður þægilegt. Mánudagurinn fór að mestu í réttarferð. Það var skemmtileg upplifun. Líklega hafa verið um 17 - 18.000 kindur í réttinni og mikill handagangur að draga í rétta dilka.

Ég set hér með mynd úr réttarferðinni.

laugardagur

Það er enn og aftur komin helgi - tíminn líður hratt. Við Dóra sitjum þó sem fastast á Varmalandi og förum ekki fet, nema kannski í Borgarnes. Ég var reyndar lagður af stað á Borðeyri seinni partinn í gær og var kominn upp að Hreðavatni þegar ég áttaði mig á að ég hefði ekki lykil að Brynjólfshúsi meðferðis. Snéri því við til baka. Hrefna og Gummi komu í heimsókn. Þau voru á leiðinni vestur á Barðaströnd að smala um helgina. Þau smala fyrir Einar og Bíbí - hafa gert það nokkrum sinnum.

Síðustu dagana hef ég kennt saman tveimur bekkjum - 4. og 5., og geri það fram á miðvikudag. Á mánudag verður farið með börnin í Þverárhlíðarrétt.

Svona er nú það.

Af tíðindaleysi

það eru litlar fréttir að segja af okkur Dóru. Tilveran er að falla í ákveðinn farveg - vinna, eta og sofa, auk tilfallandi Reykjavíkurferða um helgar. Þar erum við núna þegar þetta er skráð. Við fórum í mat til Oddnýjar í gærkvöld. Hún er orðin Svíþjóðarvinur eftir ferðina þangað í síðustu viku. Úa er að byrja í ballettskóla í dag. Við förum því væntanlega að stunda ballettsýningar á komandi árum.

Máni passar sem stendur íbúðina á Varmalandi og Andri er að ala upp nýjan kattastofn á Laugarnesveginum. Þar eru kisurnar fjórar sem stendur.

Skarphéðinn, sjarmatröll, er byrjaður á leikskóla úti í Köben og gengur, held ég, bara vel.

Ég hitti pabba og mömmu áðan í Hólaberginu. Sárið hennar mömmu er nú óðum að gróa svo að það lítur bara vel út með þann bata.

Þetta er staðan svona í hnotskurn - og ekki orð um það meir að þessu sinni.

Af vinnusemi og fleiri löstum

Hugsið ykkur bara hve vinnusöm við Dóra erum. Klukkan er 21:00 og hvar haldið þið að við skötuhjúin séum stödd annars staðar er í skólanum. Dóra að vinna - ég er reyndar að pikka þetta á tölvu í augnablikini.

Máni er orðinn Varmlendingur og farinn að kanna nýjar veiðilendur. Í skóginum má eflaust finna ýmislegt ætt ef að er gætt með kattaraugum.

Svona er nú það. Við heyrðum í Bergrúnu áðan. Hún er bara hin hressasta og er á leiðinni til Kanada í fyrramálið - langt flug.

Ég gekk á "fjallið" áðan. Það er auðvitað saga til næsta bæjar. Ég hét því í aðgæsluleysi að gera það daglega en hef ekki staðið við það - það rignir svo mikið þessa dagana.

Úr Hólmgarði

Stödd í Hólmgarðinum. Búinn að taka þann bláa í gegn. Þvo hann og bóna að utan og innan. Hann er því vel bónað glæsifaratæki en því miður með tilheyrandi beyglum og riðblettum. Dóra er búin að setja allt á hvolf í íbúðinni og sér ekki fyrir endann á því öllu saman. Hún er að taka til og þvo þvotta. Veðrið er gott og fuglarnir syngja - þ.e. þeir sem ekki eru farnir af landi brott á eftir þeim Bergrúnu, Heiðufjölskyldu og Oddnýju sem brá sér til Sverige í embættiserindum. Fórum í Keflæk í gær að skoða mömmu, ömmu, Steinunni og Ljósanóttina -um miðjan dag. Gengum einn rúnt um hálfa Hafnargötuna. Þá stytti upp og sólin fór að skína. Átum kjötsúpu hjá tengdó. Forðuðum okkur heim á undan umferðaröngþveitinu sem stóð, að sögn, fram til 2 um nóttina - allt strand á Reykjanesbrautinni.

Förum í Borgarfjörðinn í kvöld og höldum áfram að uppfræða sveitalýðinn og afkvæmi háskólaborgara á Bifröst.

Bergrún veifar víða fæti þessa dagana. Hér er fótur hennar á hótelsvölum í París.

Á Varmalandi

Nú er fyrstu vikunni við kennslu á Varmalandi að verða lokið. Það er föstudagur í dag. Þetta er dagurinn sem Heiðufjölskylda fer til Danmerkur. Því miður getum við ekki fylgt þeim á völlinn - þau villast nú samt varla.
Annars er þetta búin að vera ágæt vika. Kennslan er ekkert stórvandamál. Það er helst að Dóru leiðist að komast ekki á fullan skrið í sérkennslunni. En það horfir nú allt til betri vegar - það verður örugglega nóg að gera hjá henni.
Við förum til Reykjavíkur seinni partinn og verðum þar um helgina. Það gæti skeð að við færum til Keflavíkur.

Af bæjarferð

Wonderbrass

Nú erum við Dóra stödd í Reykjavík. Í augnablikinu í Hólmgarðinum. Komum hingað á fimmtudagskvöld - það var frí í skólanum á föstudaginn. Ég hef verið að snúast í kringum bíla. Það voru bilaðar bremsur á þeim græna, en nú líður honum betur í hjólunum. Pústviðgerð og skoðun á pabbabíl. Svo var ég að enda við að þrífa þann græna að innan svo að honum ætti einnig að líða betur innvortis.
Það líður að því að Heiðufjölskylda fari til Köben. Brottfarardagur er á föstudaginn kemur, þann 31. Þá verður ívið tómlegra í Hólmgarðinum. Það hefur verið frábært að hafa þau svona nálægt í allt sumar en viðbrigðin þeim mun meiri. Ég á nú þó von á að þau verði kát að komast á eigin heimili eftir þessa útlegð.
Bergrún er í Frans sem stendur, síðan í Skotlandi, Írlandi, USA og Kanada og kemur ekki heim fyrr en í lok september.

Við hittum Andra áðan. Hann var á leiðinni upp að Stöng í Þjórsárdal að hitta félaga.
Nú er kennslan að taka við. Það er ágætt að fara að vinna eitthvað - hætta þessu hangsi.

Það er nú nefnilega það.

Nokkrar myndir

Dóra á ferð með Skarphéðni

Dóra í rennibraut með Skarphéðinn

Skarphéðinn á leikvelli

Andri, Heiða og Bergrún

Af menningarástandinu

Við Dóra komum til Reykjavíkur í gær, laugardag, eftir dvöl frá því á mánudag á Varmalandi. Það má segja að við séum í eins konar aðlögun, eins og börnin á leikskólanum. Hlutirnir eru að komast á hreyfingu og við farin að undirbúa kennslu og skólahald. Það er ný upplifun fyrir mig að þurfa ekki að hafa áhyggjur af því að koma öllu batteríinu í gang. Það vantar enn kennara á Varmaland. Staðan er öllu verri í Vogunum, skilst mér. Ég hitti kennara í gær sem leist illa á ástandið.

Við hittum gamla kunningja úr kennarastétt á námskeiði á fimmtudag, Magga á Háhóli og Stína frænka voru þar á meðal.

Ég fór einn yfir á Borðeyri seinni part fimmtudags og var fram á kvöld. Reif plötudót af veggjum í skúr.

Menningardagurinn, sem kölluð er nótt, var tekinn að mestu í fylgd Sillu og Fúsa og við vorum komin heim í Hólmgarð um 24:00.

Þessa stundina, 9:30 á sunnudegi, er steikin að byrja að hitna í ofninum. Við ætlum að kveðja Bergrúnu með steik í hádeginu, því um 16:10 leggur hún upp í 3ja hluta hljómleikaferðarinnar. Nú er það Frakkland, Írland, Skotland, Bandaríkin og Kanada (aftur).

Heiða og Gaui fara til Köben 31. ágúst.

Af Andra er það helst að frétta að kisan hans eignaðist 3 kettlinga nýverið.

Úr Svínaríki

Undanfarna daga höfum við Dóra verið á Varmalandi en skruppum þó á Borðeyri til að ná í dót. Í leiðinni tókst okkur að klófesta rafvirkja sem leysti rafmagnsvandamálið sem er búið að vera að þjaka rafkerfi Brynjólfshúss í sumar.

Á Varmalandi er ósköp rólegt. Ég er vanari meira stressi á þessum tíma - þegar allt á að vera á fullu við undirbúning skólahalds. Þeir eru svo rólegir í tíðinni þarna að þeir eru ekki einu sinni farnir að panta húsgögn í í þær skólastofur og aðstöðu sem á að taka í notkun í skólabyrjun.

Núna er ég í Rvk. Við komum hingað í gær. Ókum Dragann og stoppuðum í Svínadalnum til að skoða berjasprettu. Hún er bara þónokkur, jafnvel aðalbláber, þó að ekki séu þau neitt í líkingu við það sem maður átti að venjast í Vatnsfirðinum.

Þegar við vorum í Svínadalnum hringdi Heiða. Hún var á leið upp í Svínadal og ætlaði að gista þar í sumarbústað. Skarphéðinn var kominn þangað á undan með hinu ömmu og afa settinu.

Verslunarmannahelgi

Það er búið að vera róleg hjá okkur um helgina. Engin ferðalög eða vesen. Heiða og fjölskylda er á Akureyri og Bergrún svolítið á næturróli. Við fórum í kaffi til Sillu og Fúsa sem eru nýlega komin heim úr mánaðardvöl í Grikklandi. Grikkland er draumalandið að þeirra sögn og miðað við lýsingar þeirra á ég auðvelt með að trúa því.

Nú nú, í kvöld ætlum við að fara á tónleika í Fjölskyldugarðinum með þeim hjónum. Við fórum á svipaða tónleika á sama stað í fyrra um verslunarmannahelgi.

Svo er stefnan tekin upp á Varmaland á morgun. Heiðufjölskylda ætlar að kíkja við hjá okkur þar á suðurleið.

Af basli

Nú erum við komin aftur til Reykjavíkur eftir "útlegð" frá því á mánudag. Byrjuðum á því að fara norður á Borðeyri. Þar vorum við eina nótt, en fórum síðan að Varmalandi og bösluðum við það í eina þrjá daga að flytja dótið okkar úr geymslu í íbúð. Það voru heilmiklir snúningar. Okkur tókst að flytja allt á milli á þeim græna. Hann er galdratæki.

Oddný og Úa komu á miðvikudag og voru hjá okkur fram á fimmtudagskvöld. Bergrún skrapp einnig í heimsókn til okkar í gær, fimmtudag, og gerði stuttan stans. Allar þessar kvensur fengu sinn skammt af burði.

Ég leit vil í Hólabergið áðan og heilsaði upp á þau gömlu. Hrefna og Gummi er á Horni (fóru á þriðjudag) og stundar göngur þaðan með KÍ-hópi og koma ekki heim fyrr en um miðja næstu viku.

Heiða og Gaui eru að pæla í að skreppa á Norðurlandið um helgina og líklega veðum við hér í Reykjavík um helgina og búum okkur undir næstu vendingu.

Myndirnar eru af sveppnum árlega á Borðeyri og útsýni úr stofuglugga á Varmalandi.

Nú nú....

Þá held ég nú að mamma sé komin á góðan skrið, farin að baka jólakökur og skonsur. Og í morgun fór ég með einar 6 lopapeysur fyrir hana í Handprjónasambandið og færði henni miklar birgðir af lopa frá þeim ágætu konum sem þar ráða húsum.

Veðráttan er sérkennileg þessa dagana, hiti, sólarglennur og skúraveður - stundum með svo mikilli úrkomu að slíks eru fá dæmi - einmitt, fádæmi.

Bergrún er í Sviss. Búin að vera á Spáni og Ítalíu í brakandi hita. Hún hefur því náð að þorna vel eftir bleytuna á Hróarskeldu í byrjun mánaðarins. Hún kemur heim í vikulokin og verður á landinu fram yfir miðjan næsta mánuð.

Við Dóra fórum í Grasagarðinn í dag með henni Úu. Það kemur manni á óvart hve þetta svæði er orðið skemmtilegt til útivistar - að ég tali nú ekki um veitingaaðstöðuna á svæðinu, enda örtröð.

Úa var uppteknust af andarungum, folaldi og vatnsbununni sem er alveg tilvalin til að drekka úr og blotna svolítið um leið í andlitinu.

Hjörtur og Emilía komu í bæinn í gærkvöld eftir nokkurra daga ferð suður og austur - alla leið á Djúpavog. Ánægð með ferðina.

Nú líður að því að við Dóra förum að koma okkur fyrir á Varmalandi. Líklega verður það um/uppúr helgi.

Af flakki

Sólheimar


Báturinn Búlki í vör


Úa og kríuungi

Við Dóra lögðum land undir hjól á þriðjudaginn og vorum að koma heim. Við fórum fyrst á Borðeyri og notuðum daginn til málningaverka. Það var hið besta veður sól og hiti og krakkar að baða sig í sjónum fyrir framan húsið. Tókum miðvikudaginn snemma og vorum komin í Stykkishólm rúmlega 8:30.

Þaðan var haldið út í Flatey. Þar hittum við Oddnýju, Úu og Steinunni - þær fóru þangað á þriðjudag og ætluðu að gista þar tvær nætur, sem þær og gerðu. Það var blíðaskapar veður í Flatey og upplagt að skoða sig um á eyjunni. Fórum í kirkju og kirkjugarð og í framhaldinu gróf ég upp ættingja, eða öllu heldur sáu ættingjarnir okkur og buðu í kaffi. Það voru ekki þessir í kirkjugarðinum, heldur afkomendur Jóns móðurbróður. Þeir eiga hús í Flatey og eru þar iðulega á sumrin. Hitti einnig aðra ættmenn með dálítið lengri tengingar í. Það voru afkomendur Þórðar Benjamínssonar sem var samtíða afa og ömmu við búskap í Hergilsey.

Við vorum í Eyjunni alveg fram til kl. 20:00 og vorum komin til baka að Borðeyri klukkan að verða tólf.

Dóluðum heim í rólegheitum í dag og komum heim kl. 17:00

Þannig var nú það....

Set hér nokkrar myndir með úr ferðinni.

Gula húsið sem á einni myndinni eru Sólheimar, hús afkomenda Jóns frænda. Þarna má sjá Oddnýju Halldórsdóttur, Dóru, Oddnýju Jónsdóttur og Guðrúnu dóttur hennar.

Helgin

Við hjónin unnum það afrek að komast í hjólatúr á laugardaginn. Undirbjuggum málið á föstudaginn með því að sækja okkur loft í reiðhjóladekkin. Hjóluðum út Fossvog og inn Ægissíðu og buðum okkur í kaffi hjá Oddnýju - síðan sömu leið til baka. Við erum ákaflega stolt af þessu uppátæki.

Dóru tókst loksins að koma auga á Emilíu hans Hjartar, þegar við fórum í Hólabergið. Þau eru á leiðinni á Hornafjörð að heimsækja gamla kunningja hennar.

Laugardagurinn var notadrjúgur því við fórum í Keflavík og heimsóttum tengdó.

Sunnudagurinn varð hálf bæklaður. Við fórum á Þingvelli og ókum mikið malarvegi. Það er ekki skemmtilegt eftir langvinna þurrka.

Svo kom Heiða og fjölskylda heim í gærkvöld eftir tveggja daga ferð til Sauðárkróks. Skarphéðinn var í miklu stuði.

Af ýmsu að taka

Ég er nýkominn úr ferð á Borðeyri. Var að flýja sólskinið og góða veðrið hér sunnan heiða og anda að mér norðankælunni. Dóra var heima og passaði börn - frekar tvö en eitt. Á Borðeyri var ég að mála, klippa tré og reyna að veiða silung, en það gekk nú ekkert að þessu sinni. Samt sem áður var þetta ágæt ferð og fínt að vera svona einn með sjálfum sér.

Heiða átti afmæli í gær og er nú orði 28 ára gömul. Hún á von á honum Gauja sínum heim frá Kaupmannahöfn í kvöld. Þau eru síðan á leiðinni norður á Sauðárkrók á morgum, held ég.

Bergrún er á Spáni og spilar á morgun í Bilbaó á Esplanada del Museo Guggenheim.

Oddný ásamt barni og móður er á leið út í Flatey um helgina til að upplifa töfra Breiðafjarðarins. Henni veitir ekki af því, bíllinn hennar bilaði enn og aftur.

Við Dóra erum ekki með nein sérstök plön fyrir helgina - frekar en oft áður.

Ég set hér með eina mynd af aðmírálsfiðrildum í tilhugalífsstellingum svona til að undirstrika sumarblíðuna.

Úr heiðardalnum

Við flugum heim frá Köben í gær. Þó að flogið væri á mettíma, tveimur og hálfri klukkustund, taka svona ferðir á taugarnar, sérstaklega þegar litlir kallar eru með í för.

Gaui og Árni vinur hans komu með okkur á völlinn en fóru síðan að undirbúa sig undir enn einn dag á Hróarskeldu.

Heiða, Gaui og Árni voru á Hróarskeldu á fimmtudaginn. Þessi dagur fer væntanlega í sögubækur. Ekki vegna þess að þau hafi verið þar á hljómleikum heldur vegna úrhellisrigningar og eðjuflóðs sem sló víst öll met. Kjöraðstæður fyrir flóðhesta. Bergrún útvegaði baksviðspassa sem björguðu miklu.

Og nú erum við heima, svolítið vönkuð en þó bara furðu vel haldin. Ég fór í gær og hitti Hjört og Emilíu í Hólaberginu. Þau komu í gærmorgun. Þau eru bæði sæt og sæl. Andri og Reynir komu einnig til að heilsa upp á sinn gamla uppáhaldsfrænda.

Nú er Bergrún í Amsterdam og á að spila á hljómleikum í Kultuurpark annað kvöld.

Fjölskyldumót...

Gamla kjarnafjölskyldan hittist á Ráðhústorginu í gær, en Andra vantaði þó. Bergrún kom til Kaupmannahafnar eftir hádegi í fyrradag. Búin að vera í Póllandi og víðar síðustu daga. Veðrið var með eindæmum gott, sól og blíða og alls ekki í samræmi við væntingar.

Við Dóra tókum daginn snemma og fórum með lest í bæinn. Gengum frá Hovedbanegaarden til Litlu hafneyjunnar úti á Löngulínu. Litum á Jónshús og fleiri merkar byggingar - Jónshús er nú ekkert sérstaklega fyrir augað. Guðlaugur Arason er með skýringu á því hvers vegna hafmeyjunni helst svona illa á höfðinu. Fyrirmyndirnar eru tvær; höfuðið er af einhverri ballerínu en líkaminn er eftirmynd eiginkonu listamannsins - að undanskildum sporðinum. Líkaminn hafnar því ágræðslunni. Þetta er þekkt úr læknisfræðinni.

Við fórum saman að borða á einhvern ítalskan veitingastað. Sem sagt fjölskyldan. Hafmeyjan situr enn á sínum harða rassi á sínum harða steini.

Annars var þessi dagur, dagur hinnar miklu leitar að stígvélum. Guðjón var sumsé að leita sér að stígvélum til að vera í á Hróarskelduhátíðinni. Hann fór um Kaupmannahafnarsvæðið þvert og endilangt án árangurs, engin stígvél til. Vinur hans fann loks handa honum stígvél í Odense!

Bergrún kom með tvo frímiða á hátíðina og baksviðspassa handa Heiðu og Gauja. Þau hittast því í kvöld.

Á morgun er svo ferðinni heitið heim á leið. Flogið er eftir hádegi og við því ekki komin heim fyrr en um kvöldið.

Fra Köben

Það er svosem ekkert sérstakt að frétta úr Danaveldi. Veðurspáin alltaf sú sama, rigning og kalsaveður. Hef samt ekki enn lent í neinni rigningu og það hefur verið sólarskíma upp á hvern dag. Það blæs örlítið, en hvaða Íslendingur er ekki vanur því?
Í gær fórum við út á Drageyri með Heiðu og Gaua og síðan niður í Kristjaníu til að sjá hvað varð um hina hugsjónaríku hippa sjöunda áratugarins. Sá nokkra tannlitla úr sér gengna hasshausa sem báru þess merki að hafa tekið of mikið út á lífskreditkortið sitt.
Drageyri er skemmtilegt sjávarþorp. Í gamla bænum eru sérlega vel varðveitt gömul hús - sum hver með stráþökum.
Frá Kristjaníu gengum við niður á Strikið. Dóra kvartar um að ég þurfi sífellt að vera að stoppa og glápa. Ég er auðvitað að skoða mannlífið og umhverfið - snýst þetta ekki um það?
Ég er ekki enn búinn að fara á Hvids.., við sjáum til með það - hins vegar tilheyrir að fá sér bjór þegar maður er í K.

Þar sem ég er ekki með neina mynd frá okkur í tölvunni set ég eina af Oddnýju og Úu frá því að þær voru hér í maí.

Af utanferð

Sumir tala um að þeir séu að fara út þegar þeir bregða sér út fyrir landsteinana. Hið rétta er auðvitað að menn fara utan. Við erum sem sé að fara utan til Köben á morgun. Hér fyrr á öldum voru menn að þvælast í hafi vikum saman og undir hælinn lagt hvar land var tekið ef menn á annað borð komust á leiðarenda - stundum brutu menn skip sitt í landtöku. Þá tíðkaðist einnig að ganga á fund konungs og reyna að koma sér í mjúkinn hjá honum í von um að hann léti einhver verðmæti af hendi rakna - kannski hitti ég Margréti Þórhildi á krá og hún splæsir bjór. Skarphéðinn og langafi fylgjast með flugu

Flogið verður um eittleytið og við verðum því komin til höfuðborgarinnar síðdegis.

Engin sérstök plön eru uppi um athafnasemi þessa daga sem við stoppum, nema kannski að fara á Hvids Vinstue eða Skindbuksen - ef Dóra samþykkir. Jú, við ætlum að skoða Kronborgarkastalann.

Bergrún er núna í Brussel - á að spila á fimmtudaginn (28.). Andri er búinn í fríinu sínu og farinn að vinna aftur. Þetta var stutt frí.

Hitti Rönku í Hólaberfinu í dag. Hún var að baka bollur og snúða í kílóavís - sem bætist við það sem Fríða bakaði um daginn - þetta endist eflaust fram undir jól.

Ef ég kemst í tölvu í Köben segi ég e.t.v. fréttir af okkur - annars bara bless þar til næst...

Kominn í frí.......... eða þannig

Það má auðvitað segja að maður sé kominn í frí. Ég fór ekki í vinnu í morgun en á þó eftir að ganga frá ýmsu.

Nú er Ranka systir á landinu, eins og komið hefur fram. Í gær kíktum við Heiða og Skarphéðinn í Hólabergið og átum þar ljúffenga rjómatertu sem Ranka hafði bakað. Fór með Dóru þangað í morgun til að smakka á þeirri sömu tertu. Ég skrapp svo með pabba í bankaleiðangur en Dóra fór í ferðalag með mömmu sína, Díu, Oddnýju og Úu. Ferðinni var heitið á Þingvelli og víðar. Hér er mynd af Rönku o.fl

Sit hér einn heima - það er ekkert slæmt. Veðrið er gott og fuglarnir syngja og kettirnir eru væntanlega á veiðum - þetta er veiðitími þeirra. Máni er samt hættur að bera björg í bú, enda þekkir hann það af biturri reynslu að því er ekkert vel tekið. Furðulegt með mennina sem sjálfir drepa sér til matar.